Die eerste byeenkoms in die avontuurkamp Sediba Kwêle buite Brits was in 2023 toe 16 jongboerspanne deelgeneem het. In 2024 het ditaangegroei tot 20 spanne en vanjaar word 22 spanne verwag. Die jongmanne severnuf gaan in tien aktiwiteite getoets word en die wenspan sal as die Baas vandie Plaas gekroon word.

Michelle Kuyler, OBARO se bestuurder van bemarkingskommunikasie, sê meer gereelde skakeling tussen jong boere uitverskillende streke is noodsaaklik vir die vooruitgang van landbou. Daarom bied dié landbou-onderneming die byeenkoms, wat deur 38 borge ondersteun word, aan.

So word vriendskappe gesmee wat die grondslag lê vir die deelvan inligting en gesamentlike oplossing vir die probleme waarmee landbou sukkel.

“Ons sien uit daarnaom meer as 200 boere te verwelkom,” het sy gesê. Die eerste prys is R100 000, die naaswenner kry R50 000 en die derde prys beloop R25 000. Daar is ook ‘n prys van R25 000 vir die boer met die beste geesdrif.

Die prysgeld moet vir ‘n spesiale projek gebruik word.

In 2023 het Ohrigstad gewen. Hulle het die prysgeld gebruik om ‘n gevorderde hommeltuig te koop wat vir plaasveiligheid aangewend word. Verlede jaar het Brits geseëvier en het ‘n deel van die prysgeld aanliefdadigheid geskenk en die res gebruik om hul boereverenigingsaal op te knap.

Martin Greyling, voorsitter van die Brits-jongboerevereniging, het die saadjie vir die byeenkoms geplant om jong boere oor die distriksgrense heen te verenig omdat hulle ‘n baie groot rol speel. Sonder hulle is daar nie ‘n toekoms vir landbou nie.